“Zərərli vərdişlərə yox deyək, həmişə sağlam olaq!” devizi altında kikboksinq üzrə kadetlər, yeniyetmələr və gənclər arasında Naxçıvan Muxtar Respublika Birinciliyi keçiriləcək. Yarış 12 iyun 2026 tarixində saat 11:00-da Naxçıvan şəhərindəki İlham Əliyev adına Olimpiya İdman Kompleksində başlayacaq.
Birincilik Naxçıvan Muxtar Respublikasının Gənclər və İdman Nazirliyi və Azərbaycan Kikboksinq Federasiyasının birgə təşkilatçılığı ilə keçiriləcək. Turnirin əsas məqsədi gənclər arasında sağlam həyat tərzinin təbliği, zərərli vərdişlərə qarşı mübarizə, idmançıların yarış təcrübəsinin artırılması və ölkədə kikboksinqin inkişafına töhfə verməkdir.
Birincilikdə respublikanın müxtəlif şəhər və rayonlarını təmsil edən idmançılar qüvvələrini sınayacaq. Qaliblər və mükafatçılar diplom və medallarla təltif olunacaq.
Yarışların yüksək səviyyədə, şəffaf və beynəlxalq qaydalara uyğun keçirilməsi üçün döyüşləri Azərbaycan Kikboksinq Federasiyasının hakimlər kollegiyası idarə edəcək və qiymətləndirəcək.
Azərbaycan Kikboksinq Federasiyası ölkədə kikboksinqin inkişafı, gənc idmançıların yetişdirilməsi və beynəlxalq arenalarda uğurların qazanılması istiqamətində fəaliyyətini davam etdirir. Federasiya bütün iştirakçılara uğurlar arzulayır və azarkeşləri yarışı izləməyə dəvət edir.
Mənbə: WAKO Azerbaijan (Facebook)