8–10 avqust 2026-cı il tarixlərində Türkiyənin Qars şəhərində beynəlxalq kikboksinq turniri keçirilib. Turnirdə 10 ölkədən 413 idmançı, o cümlədən Azərbaycan, Türkiyə, Gürcüstan, Əfqanıstan, Livan, İran və Ermənistan idmançıları iştirak ediblər.
Naxçıvan Muxtar Respublikasını yarışda üç komanda təmsil edib: məşqçi Etibar Qəribovun rəhbərlik etdiyi Levent Bulut Fight Club, Şərur komandası və məşqçi Elvin Qoçəliyevin rəhbərlik etdiyi Naxçıvan Araz Kikboksinq Klubu.
Naxçıvan Muxtar Respublikasının kikboksçuları turnirdə 22 qızıl və 12 gümüş olmaqla, ümumilikdə 34 medal qazanıblar.
Federasiyanın qeyd etdiyi kimi, bu nəticə Naxçıvan Muxtar Respublikasında kikboksinqin uğurla inkişaf etdiyini, gənc idmançıların böyük potensiala malik olduğunu və məşqçilərin apardığı məqsədyönlü işin bəhrəsini göstərir. Federasiya komandanın yarışa hazırlanmasında və turnirdə iştirakında böyük əməyi olan Etibar Qəribov və Elvin Qoçəliyev başda olmaqla, bütün məşqçilərə yeni uğurlar və yeni qələbələr arzulayıb.
Mənbə: WAKO Azerbaijan (Facebook)