Azərbaycan Kikboksinq Federasiyasının rəhbərliyinin və Naxçıvan Muxtar Respublikası Gənclər və İdman Nazirliyinin dəstəyi ilə 6 sentyabr 2026-cı il tarixində Naxçıvan şəhərində ikinci “Levent Bulut Fight Night Naxçıvan” döyüş gecəsi keçirilib. Low Kick bölməsi üzrə yarış İlham Əliyev adına Olimpiya İdman Kompleksində təşkil olunub, təşkilatçısı Levent Bulut Fight Club (Naxçıvan) olub.
Turnirdə Azərbaycan və Türkiyə klublarını təmsil edən 17 klubdan 144 idmançı mübarizə aparıb. Döyüşlərdən bir gün əvvəl, 5 sentyabrda, çəki mərasimi və idmançıların üz-üzə görüşləri keçirilib. Tədbirdə Naxçıvan Muxtar Respublikası gənclər və idman nazirinin vəzifələrini icra edən Məcid Seyidov və türkiyəli məşqçi Levent Bulut qonaq qismində iştirak ediblər. Fərqlənən idmançılara diplom, medal və kuboklar təqdim olunub.
Federasiyanın rəhbərliyi bölgələrdə kikboksinqin kütləviliyinin artırılmasına xüsusi diqqət yetirir. Son dövrlərdə Gəncə, Qəbələ və Naxçıvanda keçirilən yarışlar bunun nümunəsidir. Federasiyanın qarşıdakı dövr üçün əsas məqsədlərindən biri digər bölgələrdə də belə yarışların sayını artırmaq və yüksək səviyyəli turnirlər təşkil etməkdir.
Federasiya döyüş gecəsinin təşkilində əməyi olan hər kəsə təşəkkür edir, idmançılara və məşqçilərə yeni uğurlar arzulayır.
Mənbə: WAKO Azerbaijan (Facebook)